Drukuj

W Macedońskim Teatrze Narodowym od 4 lipca trwają intensywne próby przedstawienia „Przerwana odyseja”, które realizowane jest jako koprodukcja z Teatrem im. Heleny Modrzejewskiej w polskiej Legnicy, a które reżyseruje Jacek Głomb. Powstaje opowieść sięgająca historii dzieci-uchodźców z Macedonii Egejskiej w Grecji ogarniętej wojną domową, które trafiły do Polski w końcu lat 40 ubiegłego wieku. Premiera na scenie w Skopje 17 września.


Во Македонскиот народен театар од 4 јули започнаа интензивните подготовки за претставата „Прекината одисеја“, која ќе се реализира во копродукција на театарот „Хелена Моджејевска“ од Легница, Полска, во режија на Јацек Гломб.

Проектот „Прекината одисеја“ е базиран на судбината и егзодусот на децата бегалци од Егејскиот дел на Македонија кои завршуваат во Полска - голем дел во градот Легница. Во периодот од 1946 до 1949 година, Полска ги прифати децата бегалци, и беа сместени во полските училишта и образовните центри, за покасно да им се придружат и нивните родители. Дел од имигрантите создадоа свои семејства и останаа засекогаш во Полска. Дел од нив во седумдесетите години се враќаат на Балканот и во Југославија.

Оваа комплексна тема, режисерот Јацек Гломб ја започна со прибирање на податоци за сите тие големи човечки судбини, преку разговори со децата бегалци, кои беа директни учесници во големиот прогон, посета на музеи и работилници со актерите од Македонија и Полска во МНТ.

Претставата опфаќа актери од Македонија и Полска, со кои режисерот веќе работеше во театарот „Хелена Моджејевска“ во Легница. Следува работа со македонските актери во Македонскиот народен театар, чии проби започнаа на 4 јули. Подоцна, двата ансамбла ќе работат на заедничка подготовка, по што праизведбата  на претставата „Прекината одисеја“ ќе се одржи на 17 септември 2016 година во Македонскиот народен театар. Претставата ќе биде изведена 10 пати во Македонија, а во месец ноември 2016 година ќе се одигра 10 пати во Варшава, Вроцлав, Легница и Краков.

Претставата ќе се игра на двата јазици, македонски и полски, а во претставата играат околу 30-тина актери. Од ансамблот на МНТ играат актерите: Владо Јовановски, Софиа Насевска - Трифуновска, Сашка Димитровска, Снежана Коневска - Руси, Билјана Јовановска, Борче Начев, Нино Леви и Трајче Ѓоргиев.

Драматург на претставата е Роберт Урбански од Полска. Музиката е на Горан Трајкоски, а сценографијата и костимите се на Малгорзата Буланда.

Соработката помеѓу двата театри започна со меѓусебно гостување (првото официјално гостување на Македонскиот народен театар беше од 4 до 8 декември 2015 година, во еден од петте позначајни театри во Полска, Театарот „Хелена Моджејевска“ во Легница). Соработката на двата театри е, исто така, од особено значење за продлабочувањето на македонско-полската културна соработка, што се гледа и во подготовката на претставата „Прекината одисеја“, известија од Македонскиот народен театар.

(„Полскиот режисер Јацек Гломб во МНТ ја почна подготовката на претставата „Прекината одисеја“, http://www.mkd.mk, 4.07.2016)